Isang mabiyayang araw po sa ating lahat, lalong-lalo na sa ating mga Christmas Instituters ngayong 2022.

Nagisnan ko mula sa aking pagkabata na ako ay pumupunta sa Church. Kasama ko ang aking tatay, mga kapatid, at maging ang aking Lola at mga Auntie. Habang si Tatay ay nagtuturo ng Sunday School sa adult level, ako naman ay kaniyang ihinahatid sa Sunday school na itinuturo ng aming Diakonesa at volunteer Sunday school teacher.

Hanggang sa paglipas ng taon bilang isang kabataan, hindi ko namalayan na ako ay medyo nalihis o nanlamig sa pagiging aktibo sa pagpunta sa church dahil marami na akong mga napapansin sa kapaligiran lalong-lalo na sa mga kabaryo ko. Mayroong mga kagrupo, kakwentuhan, kalarong mga kaibigan, at maging mga pinsan na nanghihikayat na maglaro at mamasyal kahit araw ng linggo. Ngunit sa mga panahon ng pagiging inactive ko, parati pa rin akong pinapaalalahanan ng tatay ko na pumunta sa church tuwing araw ng Linggo.

Muling nasindihan ang alab ng aking pagiging active sa pagpunta sa church sa pamamagitan ng pag-attend at pagsali sa mga gawain nito. Pangunahin dito ay ang pagsali ko sa choir, fellowship, at sa pagsama ko sa pastor kapag ako ay pagkakataon kasama ng ilan sa mga miyembro sa mga worship services. At, hindi ko makalimutan na ang aming pastor ay pinag-lead ako ng prayer sa isang service. Ako’y muling naging active sa church hanggang ang aking kamalayan sa Dios at pamumuhay ng isang Kristiyano ay lumawak at nadagdagan sa pamamagitan ng pagdalo ko sa mga church youth activities and gatherings gaya ng mga Bible studies at fellowship. Ang pinakatanda ng aking pagiging kabataan sa patuloy na pag-alab ng aking pagiging active na miyembro ng church ay ang CHRISTMAS INSTITUTE. Sa pamamagitan nito, ang mga karanasan ng pagsamba, pakikipagkaibigan, pananalangin, pag-aaral ng salita ng Diyos ay aking naranasan. Aking nakilala nang lubos ang ating Panginoong Jesu Cristo, tinanggap siya bilang Panginoon at tagapagligtas, naunawaan ang Kristiyanong pananampalataya, at natutunang italaga ang buhay sa paglilingkod sa Diyos at sa kapwa. Ito ang siyang patuloy na saligan at pundasyon tungo sa pag-equip o pagsasanay at paghubog ng mga disipulo ng ating Panginoong Jesu Cristo para sa transpormasyon ng mundo.

Nawa ang tema natin sa ating Christmas Institute ngayong taon na “Paghilom: Panahon ng Paghinga” ay maging saligan ng ating matatag na pananampalataya at pananalig sa Diyos. Isang pagpapatibay at pagdiriwang sa kapangyarihan, presensiya, kabutihan, at psasalamat sa patuloy na biyaya ng Diyos sa kabila ng naranasang pandemya at mga bagyo ng buhay. 

​

Purihin at Pasalamatan ang Panginoon! Salamat sa ating mga magulang at mga mahal sa buhay. Salamat sa ating Iglesia, salamat sa ating mga Church workers, at salamat sa ating mga Layko. Mabuhay ang UMYF at ang lahat ng Christmas Instituters!

​

TO GOD BE THE GLORY! AMEN!